YOUTHS AND THEIR FUTURES

 "လူငယ် နှင့် အနာဂတ်

 ( Youths and their futures)

   """"""""""""""""""""""""""""""""""""""""

မြန်မာစကားမှာ ယ​နေ့​လူငယ် နောင်ဝယ်လူကြီးဆိုတဲ့ စကားတစ်ခုရှိပါတယ်။ ယ​နေ့​ခေတ်လူငယ်​တွေဟာ အနာဂတ်မှာ လူကြီးဖြစ်လာမယ့်သူတွေဖြစ်တယ်။ တိုင်းပြည်ရဲ့ တာဝန်အရပ်ရပ်ကို ပုခုံး​ပြောင်းတာဝန်ထမ်း​ဆောင်ရမယ့်သူတွေဖြစ်တယ်။ တစ်နည်းအားဖြင့် လူငယ်​တွေဟာ တိုင်းပြည်ရဲ့ အနာဂတ်လည်းဖြစ်ပါတယ်။

ဆိုလိုတာက လူငယ်​တွေ​ကောင်းမှ တိုင်းပြည်ရဲ့ အနာဂတ်​ကောင်းမှာဖြစ်တယ်။ လူငယ်​တွေညံ့ရင် တိုင်းပြည်ရဲ့ အနာဂတ်ဟာညံ့မယ်။ လူငယ်​တွေပျက်စီးရင် တိုင်းပြည်ရဲ့ အနာဂတ်ဟာ ပျက်စီးမယ်။ တိုင်းပြည်ရဲ့ အနာဂတ်ဟာ ကျ​​နော်တို့ အားလုံးရဲ့ အနာဂတ်လည်းဖြစ်ပါတယ်။ 

တိုင်းပြည်တစ်ပြည်ရဲ့ အနာဂတ်ဟာ ကြီးပွားတိုးတက်လာမလား ဆုတ်ယုတ်နိမ့်ကျသွားမလားဆိုတာ သိချင်ရင် ပစ္စုပ္ပန်မှာ ဒီတိုင်းပြည်ရဲ့ လူငယ်​တွေ ဘာ​တွေကို စိတ်ဝင်စားနေလဲ၊ ဘယ်လိုကိစ္စ​တွေမှာ အချိန်ပေး​နေလဲ ဆိုတဲ့အချက်ကို ကြည့်ပြီး မှန်းဆနိုင်ပါတယ်။ 

ဒါ​ကြောင့် တိုင်းပြည်တစ်ပြည်ရဲ့ အနာဂတ်ကို အ​ကောင်းဆုံးဖြစ်​စေချင်ရင် လူငယ်တွေရဲ့ ပစ္စုပ္ပန်ကို အ​ကောင်းဆုံး ဖန်တီးပေးဖို့လိုပါတယ်။ ခု​ခေတ်ကာလမှာ ကပ်​ရောဂါ အ​ခြေအ​နေ​ကြောင့်​ရော နိုင်ငံ​ရေးအ​ခြေအ​နေ​ကြောင့်​ရော တိုင်းပြည်ရဲ့ ယန္တရားတွေ က​မောက်မက​ဖြစ်နေချိန်မှာ လူငယ်​တော်​တော်များများက ပညာ​ရေးအပါအဝင် သူတို့ရဲ့ အနာဂတ် အိပ်မက်​တွေ၊ အနာဂတ် ရည်မှန်းချက်တွေ ​ဝေ​ဝေဝါးဝါး ဖြစ်လာကြတယ်။ လမ်း​ပျောက်သလိုဖြစ်လာကြတယ်။ 

လူငယ်တွေရဲ့ အနာဂတ်​ပျောက်တာဟာ တိုင်းပြည်ရဲ့ အနာဂတ် ​ပျောက်တာပဲဖြစ်ပါတယ်။

လူငယ်​တွေရဲ့ အနာဂတ်​ဝေဝါးတာဟာ တိုင်းပြည်ရဲ့ အနာဂတ်​ဝေဝါးတာပဲ ဖြစ်ပါတယ်။

ဒါကြောင့် လူငယ်​တွေကိုယ်တိုင်လည်း ကိုယ့်ရဲ့ အနာဂတ်လမ်းကို မဆုတ်မနစ်​သော ဇွဲလုံ့လနဲ့ ကိုယ်တိုင်လမ်း​ဖောက်ဖို့ ကြိုးစားကြရမှာ ဖြစ်သလို လူကြီး​တွေကလည်းပဲ လူငယ်​တွေရဲ့ အနာဂတ်ကို ပဲ့ကိုင်လမ်းပြပေးဖို့ လိုပါတယ်။

ဒီ​နေရာမှာ လူကြီးနဲ့ လူငယ်ကြားမှာ တစ်ခါတစ်ရံ ပဋိပက္ခ အသွင်​ဆောင်တဲ့ အမြင်ကွာဟမှု​လေး​တွေ ဖြစ်ပေါ်တတ်ပါတယ်။

တကယ်​တော့ လူငယ်​တွေဟာ ရဲရင့်တယ်၊ တက်ကြွတယ်၊ စွန့်လွှတ် စွန့်စားရဲတယ်၊ စူးစမ်းတတ်တဲ့ သဘာဝရှိတယ်၊ ​အ​တွေ့အကြုံ ဗဟုသုတအပိုင်းမှာ​တော့ လူကြီး​တွေ​လောက် မကြွယ်ဝတဲ့အခါမှာ တစ်ခါတစ်ရံ စိတ်ကူးယဥ်ဆန်တာမျိုး​လေး​တွေ ရှိတတ်ပါတယ်။ လူကြီးတွေဆီက အ​တွေ့အကြုံ ဗဟုသုတ​တွေနဲ့ ​ပေါင်းစပ်နိုင်ရင်​တော့ ဆန်းသစ်နိုင်စွမ်း၊ တီထွင်ကြံဆနိုင်စွမ်း လူငယ်​တွေမှာ ရှိတယ်။ 

လူကြီး​တွေကျတော့ အသိဥာဏ်ရင့်ကျက်တယ်။ အ​တွေ့အကြုံနဲ့ သင်ခန်းစာ​တွေလည်းပဲ သူတို့မှာရှိတယ်။ သံ​ယောဇဥ် အ​နှောင်အဖွဲ့​တွေ ရှိလာတဲ့အခါကျတော့ တချို့ကိစ္စ​တွေမှာ ချိန်ဆနေရတာမျိုး၊ ရင်းနှီး​ပေးဆပ်ဖို့ တွန့်ဆုတ်နေတာမျိုး၊ ​တော်ရုံကိစ္စ​တွေကို နားလည်ပေးလိုက်တာမျိုး၊ ခွင့်လွှတ်ပေးလိုက်နိုင်တာမျိုး၊ အမှန်တရားကိုလည်း တစ်ခါတစ်ရံမှာ ခြွင်းချက်နဲ့ လက္ခံကျင့်သုံးတာမျိုး​တွေ လူကြီးပိုင်း​တွေမှာ ရှိလာတတ်ပါတယ်။ 

ဘယ်လိုပဲဖြစ်ဖြစ် လူကြီး​တွေက ကိုယ့်မှာရှိတဲ့ အ​တွေ့အကြုံ ဗဟုသုတ​တွေ သင်ခန်းစာ​တွေကို လူငယ်​တွေဆီ ​ပေါင်းထည့်ပေးလိုက်ရင် လူငယ်​တွေက သူတို့ရဲ့ ရဲရင့်တက်ကြွမှုတွေ၊ တီထွင်ဆန်းသစ်နိုင်စွမ်း​တွေ အတွေးသစ်၊ အမြင်သစ်​တွေနဲ့ ​ပေါင်းစပ်ပြီးတော့ အနာဂတ်ကို ခရီးဆက်နိုင်မယ်၊ ဦး​ဆောင်နိုင်ကြမယ်။ 

အဲ့လိုမှမဟုတ်ဘဲ လူကြီးတွေကလည်း လူငယ်တွေ အားမရပါဘူး၊ ဟိုဟာဖြစ်တယ်၊ ဒီဟာဖြစ်တယ်၊ ဒါ​တွေက ငါတို့လုပ်ခဲ့ပြီးပြီ၊ မအောင်မြင်ပါဘူး၊ ဘာမှဖြစ်လာမှာ မဟုတ်ဘူး၊ စိတ်ကူးယဥ်မ​နေနဲ့ ဆိုတာမျိုး​ အပြစ်တွေပြောမယ်။ 

ဥပမာ​ပေါ့ လူကြီးဖြစ်တဲ့သူက ကိုယ်ငယ်ငယ်က ဂစ်တာတွေတီးမယ်၊ ကဗျာတွေရေးမယ်၊ အိမ်ထောင်ကျသွား၊ အလုပ်​တွေရသွားတဲ့အခါမှာ ဒါ​တွေကို ဆက်မလုပ်​​ဖြစ်တော့ဘူး​။ ပိုးသေသွားပြီ။ ပြီးသွားပြီ...။ 

ဒါတွေကို သူ့​ရှေ့မှာ လူငယ်တွေလုပ်နေတာ တွေ့ပြန်တော့ အလကားပါကွာ ဒါတွေက ငါတို့လုပ်ခဲ့ပြီးပြီ။ ကဗျာဆရာလည်း ဖြစ်မလာဘူး။ ဂီတသမားလည်း ဖြစ်မလာဘူး။ ဒါက မင်းတို့ ငယ်သေးလို့ အရူးထတဲ့ အလုပ်တွေ။ ဘာမှဖြစ်လာမှာ မဟုတ်ဘူးလို့ ပြောတယ်ဆိုပါတော့။ တကယ်တမ်းကျတော့ ကိုယ့်တုန်းက မဖြစ်ခဲ့​ပေမယ့် သူတို့အလှည့်ကျ ဖြစ်ချင် ဖြစ်မှာပေါ့။ ပုံ​သေ​ပြောလို့မရတဲ့ ကိစ္စ​တွေပါ။ ဒါက ဝါသနာအရေးနဲ့ သာဓကပေးတာပါ။ စီးပွားရေး၊ နိုင်ငံရေး ဘယ်အရေးမှာမဆို ထပ်တူပါပဲ။ 

လူကြီးတွေဘက်က အဲ့ဒီလို ကိုယ်မဖြစ်ခဲ့တိုင်း လူငယ်​တွေလည်း ဖြစ်မှာ မဟုတ်ဘူးဆိုတဲ့ အ​တွေးမျိုးရှိကြသလို လူငယ်​​တွေ အမြင်မှာလည်း လူကြီး​တွေကို ဒီလူကြီးတွေက အလကားပါ၊ ဝေဖန် ​လေကန်​နေတာနဲ့ပဲ ပြီးနေတာ၊ ဘာမှလည်း လက်​တွေ့ကျကျ အဖြစ်မရှိဘူး။ ဘာမှလည်း လုပ်နိုင်ကိုင်နိုင်စွမ်းမရှိဘူး...ဆိုတာမျိုး ဝေဖန်တတ်ကြတယ်။ (အမှန်​တော့လည်း သူတို့ငယ်စဉ်ဘဝက ကြိုးစားခဲ့တာ​တွေ ရုန်းကန်ခဲ့တာ​တွေ ရဲရင့်ခဲ့တာ​​တွေ စွမ်းနိုင်ခဲ့တာ​တွေ ရှိတာပေါ့။ ကိုယ်မှ မသိလိုက်၊ မမီလိုက်တာ။ )

​နောက်တစ်ခု။ လူငယ်​တွေ အမြင်မှာ ​ဒီလူကြီး​တွေက ငါတို့လုပ်သမျှကို အကုန် ကန့်လန့်တိုက်နေတာ၊ အ​ကြောင်းအမျိုးမျိုးပြပြီး အပျက်သ​ဘော​တွေပဲ ​ပြော​နေတာလို့ မြင်တာ​တွေလဲ ရှိမှာ​ပေါ့။ ဒါလဲ မှန်သင့်သ​လောက် မှန်တာ​ပေါ့။ အကြောင်းလဲ ရှိတာ​ပေါ့။ ကိုယ်က စွမ်းရည်ကျတဲ့အချိန်မှာ ဦး​ဆောင်ပြီး​တော့ လုပ်မပြနိုင်ဘူး။ ကိုယ့်မှာ ကြိုးစားပြီး မ​အောင်မြင်ခဲ့တဲ့ အ​တွေ့အကြုံတွေ၊ ​လောကဓံ​တွေ ရှိထားသလို မလိုအပ်ဘဲ ရင်းနှီး​ပေးဆပ်လိုက်ရပြီး​တော့မှ ဘဝမှာ အရာမထင်ခဲ့တဲ့ ဒဏ်ရာဒဏ်ချက်​တွေလဲရှိမယ်။ 

ဒီ​တော့ စိတ်ပူတတ်တယ်၊ ​ကြောက်တတ်တယ်။ ဒါပေမဲ့ ​ရှေ့မှာ​ပြောခဲ့သလို အလုပ်တစ်ခုမှာ ငါမ​အောင်မြင်တိုင်း ဘယ်သူမှ ဒီအလုပ်ကို ​မအောင်နိုင်ဘူးလို့ တော့ တွေးလို့မရဘူး။ 

ငါ့တုန်းက ဒီလိုဒီလို​တွေ လုပ်ခဲ့လို့ မအောင်မြင်ခဲ့ဘူး။ တကယ်လို့ မင်းတို့ နည်းလမ်းသစ် ရှာနိုင်တယ်ဆိုရင် လုပ်ကြည့်သင့်တယ်လို့ ​ပြောရမှာ။ လူငယ်​တွေရဲ့လုပ်ချင်စိတ်ကို ရိုက်မချိုးဘဲ လိုအပ်မယ်ထင်တဲ့ အ​တွေ့အကြုံ​တွေ ဝမ်းစာ​တွေ ဖြည့်ပေးလိုက်ရမှာ။ အကြံဥာဏ်​ကောင်း​တွေ​ ပေးလိုက်ရမှာ။ 

အခုကာလမှာဆိုရင် ကမ္ဘာနဲ့အဝှမ်း Covid-19ရဲ့ခြိမ်းခြောက်မှုဟာ စိတ်​အေးရတဲ့ အ​နေအထားမျိုး မရှိ​သေးပါဘူး။ 

(၁)"ရောဂန္တရကပ်" ​(ရောဂါဆိုက်​ရောက်တဲ့ကပ်​ပေါ့။)

(၂)"သတ္ထန္တရကပ်" (စစ်လက်နက်ဘေးအန္တရာယ်ကပ်)

(၃)"ဒုဗ္ဘိက္ခန္တရကပ်" (ငတ်မွတ်​ခေါင်းပါးခြင်းကပ်)

ဆိုပြီး ကပ်သုံးပါးရှိတဲ့အထဲမှာ ​

ဘယ်ကပ်ပဲ ဆိုက်ဆိုက်၊ အရင်ဆုံးထိခိုက်တာက လူငယ်​တွေရဲ့ ပညာ​ရေးပါပဲ။ ပညာ​ရေးတို့ ကျန်းမာ​ရေးတို့ဆိုတာ လူ့စွမ်းအား အရင်းအမြစ်တွေဖြစ်တယ်။ ပညာဆိုတာ အဆိုး အကောင်း အကျိုးအပြစ်​ကို ခွဲခြမ်း သိမြင်နိုင်တဲ့ အတတ်ဖြစ်တယ်။ ပြဿနာတစ်ခုချင်းစီရဲ့ အ​ကြောင်းရင်းဇစ်မြစ်ကို ရှာဖွေသိမြင်နိုင်တဲ့ အစွမ်းသတ္တိဟာလည်း ပညာဖြစ်တယ်။ 

ဒါ​ကြောင့် လူငယ်​တွေရဲ့ ပညာ​ရေးအခွင့်အလမ်း ဆုံးရှုံးသွားပြီ ဆိုရင် အနာဂတ်တိုင်းပြည်ဟာ အမှောင်ကျပါပြီ။ 

နောက်တစ်ခုက ကျန်းမာရေး။လူငယ်​တွေ ကျန်းမာ​ရေးလိုက်စားမှု မရှိတော့ဘူး၊ လူငယ်​တွေ ချိနဲ့ကုန်ပြီဆိုရင် အနာဂတ်တိုင်းပြည်ဟာ ချိနဲ့ပြီသာ မှတ်လိုက်​တော့။ 

ဒါ​ကြောင့် လူငယ်​တွေ စာဖတ်ပါ။ ပညာသင်ပါ။ အတန်းတက်ခွင့်ရမှ ပညာသင်နိုင်တာ မဟုတ်ဘူးဆိုတာ သိထားပါ။ အတန်းတက်ရမှ ပညာတတ်တာ မဟုတ်ပါဘူး။ သင်ရိုး​တွေကို ကိုယ်တိုင် ဖတ်မှတ်​လေ့လာ​နေလို့ ရပါတယ်။ အလွတ်တမ်း လေ့လာသင်ယူထားတဲ့လူ၊ စာဖတ်ထားတဲ့ လူက​တော့ ဘယ်စာ​မေးပွဲနဲ့ ဘယ်အချိန်မှာပဲ ဝင်ဖြေဖြေ ​အောင်မှာပါပဲ။ 

အချိန်ကို အကျိုးရှိရှိ အသုံးချပါ။ အားကစားလုပ်ပါ။ ကျန်းမာ​ရေးကို ဂရုစိုက်ပါ။ 

ကိုယ့်ရဲ့ ရည်မှန်းချက် အိပ်မက်​တွေကို လွှင့်မပစ်လိုက်ပါနဲ့။ လွှတ်မချလိုက်ပါနဲ့။ 

လူကြီးတွေကလည်း လူငယ်​တွေအတွက် ရင်လေးတယ်၊ ရင်​လေးတယ် ဆိုပြီး အိမ်မှာ ထိုင်ပြီး ရင်​လေးမ​နေပါနဲ့။ ​လေးတာ​တွေ ပိုပိုလာတာပဲ ရှိမှာပါ။ လူငယ်​တွေအတွက် အခွင့်အလမ်း​တွေ ဖန်တီး​ပေးပြီး​တော့ စွမ်းနိုင်သ​လောက်​လေး ကြိုးစားပေးရင်း တစ်ခုစွမ်းနိုင်ရင် ရင်တစ်ခါ ​ပေါ့ပါတယ်။ အဲဒီလိုနဲ့ လူငယ်​တွေအတွက်ကို အားထုတ်​ပေးကြ​စေလိုပါတယ်။ 

မြန်မာတစ်နိုင်ငံလုံးမှာရှိတဲ့ လူငယ်​တွေ အားလုံးဟာ ကိုယ့်ရဲ့အနာဂတ် ပန်းတိုင်ကို အ​ရောက်သွားနိုင်ဖို့အတွက် ​တောင်ကျ​စမ်းရေရဲ့ ဥပမာအတိုင်း ကျင့်သုံး​စေလိုပါတယ်။ ​တောင်ကျစမ်း​ရေဟာ ​တောင်ကြို​တောင်ကြားက​နေ စီးဆင်းလာတဲ့အခါ တစ်​နေရာရာမှာ ​ကျောက်တုံးတစ်တုံး ခံ​နေတယ်ဆိုပါစို့ ​ရေဟာ ​ကျောက်တုံးရဲ့ ​အောက်က​နေပြီး ဝပ်တွား ငုပ်လျှိုးပြီး​တော့ သွားတယ်။ သွားနိုင်ရင်သွားတယ်၊ သွားလို့မရရင်ခဲ့ရင် ​ဘေးနှစ်ဘက်က​နေ ​ရှောင်ကွင်းပြီး ထွက်သွားတယ်။ အဲလိုမှ မသွားနိုင်ဘူးဆိုရင် ​ရေအားစုပြီး တွန်းဖယ်ဖို့ ကြိုးစားတယ် ​။ နောက်ဆုံး ​ကျောက်တုံးကို တွန်းဖယ်လို့လည်း မရဘူးဆိုရင် ​နောက်ထပ်​ရေအားကို စုပြီး ​ကျောက်တုံးကို ကျော်ပြီးတော့ စီးဆင်းသွားတယ်။ စမ်း​ရေဟာ သူ့ရဲ့ ပန်းတိုင်ကို အ​ရောက်သွားနိုင်ခဲ့တယ်။ 

ဒီလိုပဲ လူငယ်တွေဟာလည်း ​ရည်မှန်းရာ အနာဂတ်ပန်းတိုင်ကို မ​ရောက်​ရောက်​အောင် ရတဲ့ နည်းလမ်းအသွယ်သွယ်ကို သုံးပြီး အခက်အခဲ အတားအဆီး​တွေကို ​ကျော်လွှားပြီး အ​ရောက် လှမ်းနိုင်ကြပါစေ။

                                     ​ဒေါက်တာ သန်းမင်းထိုက်